Од корпус – од топавтовкст! (ЭРЗЯ)

Од корпусонь панжомась неявикс тев аволь ансяк студентнэнень ды тонавтыцятненень, но и весе региононть туртов. Саранск ошсо панжовсь Николай Платонович Огарёв лемсэ университетэнь прявт корпусось. Течинь чинтень ошсонок те сех сэрей зданиясь. Васенце этажсто саезь шпиленть пес – 90 метрат. Од зданиянть вейсэнь площадезэ малав 29 кавонзазь метрат. Те корпусось вейсэндизе университетэнь прявт кампусонть, кона ашти 13 корпуссто. Ней студентнэ ульцяв апак лисне общежитиясто видьстэ понгить Национальной культурань институтов, физикань ды химиянь институтов, од корпусонтень, электроникань ды светотехникань институтов ды мик, культурань ды искусствань дворецентень. Мазыйдеяк мазый корпусонть дизайнэнзэ лангсо роботасть Архитектурно-строительной факультетэнь студентнэ ды преподавательтне. Прявт корпуссонть улить кавто этажонь сэрьсэ 6 поточной аудиторият. Тов кельгить 89-стэ саезь – 140 ломанть. Панжозь 100-до ламо компьютерэнь ды мультимедийной класст, компьютерэнь алтымантень вейсэндязь тёжадо ламо компьютерт. 17-це этажсонть теезь ваномань площадка, тосто неяви весе ошось!