«Наташкань арсеманзо!» (ЭРЗЯ)
Сергей Сеничевень «МХАТ-икезэ» кенярдовтынзе ваныцятнень Ярослава Пулиновичень «Наташкина мечта» произведениянзо коряс постановкасонть. Спектаклянь премьерась ульнесь ютазь иень ацамковонь 9-це чистэ, «Вайгель» од ломанень театарань фестиваленть рамкатнесэ. Од актрисатнень налксемась саинзе ваныцятнень мелест. Сюжетэнть юрсо – Наташа тейтерьканть эрямозо. Сон тряви эйкакшонь кудосо ды уш вишка пингстэ саезь кирди ламо нужачи. Киненьгак а эряви, кияк а вечксы. Ды истямо таркасо ушоды кемекставомо сонзэ чачозо. Эйкакшонь кудонь трявкстнэнь монологост ловныть од актрисат. Спектаклянь путыцятнень валост коряс, театрасо моноспектакль жанрадонть седе стака арась. Ярослава Пулиновичень те пьесась зярыя иень перть теевсь пек содавиксэкс. Максим Бусоргинэнь ды Алексей Кирсановонь путовкс спектаклясь васенцеде невтемстэнзэ истя тусь ваныцятнень мельс, што кевкстема невтемс сонзэ омбоцеде эли арась, эзь стякшно. Спектаклянь героинятнень марто вейсэ залось и ракась и авардсь. Артисткатненень удалась невтемс ансяк-ансяк ушодовиця эрямонь мельтнень-арсематнень ды трагедиянть.