Лавшо шумбрачи марто ломантненень алтазь декада! (ЭРЗЯ)
Иеде теде икеле Князевтнень кудораськесэ теевсь зыян, Александр, вейкине цёраст, томбавсь важодема таркасо, синдизе кирьгань сисемеце позвоноконть. Пель ие од ломанень аштесь мадезь, мейле ещё пель ие эзь лисневе ванькс коштсо лексеме. Мизолдыця, кортыця, аламодо виздиця – истямокс вастымизь минек Александр Князев. Аламодо кортынек ды чарькодинек – сон аволь иензэ коряс превей. Важодема таркасо прамось, карязловажань синдемась, стака операциясь — весе те кадовсь удало. Течинь чис прявт путовксось – реабилитациясь, теемс весементь, штобу стямс пильге лангс. Томбавомодо икеле сон кавксо иеть явсь мель греко-римской борьбантень. Фирмась, косо лись зыянось, лездась те кудораськентень ансяк весть — теевтсь удома тарканть вельксэс каркас. Теде мейле од ломанесь уставась кедьвиень кемекстамо. Церантень эряви теемс ламо лия упражненияткак, конат максыть вий рунгонтень, пильгтненень. Ансяк теемс тень вишка квартирасо а кода. Эряви ардтнемс специальной тренажорс, но валгомс ветеце этажсто, кудосо, косо арась лифт, кодаяк а лиси. Интернэтэнть вельде Александр кармась содамо, што ули гусеничной подъёмник, конань питнезэ малав 250 тёжат целковойть. Сонзэ рамамс кудораськенть ярмаконзо арасть. Од ломанесь кучокшнось сёрма ошонь администрацияс эрямо таркаст паролгавтомань коряс. Тосто сась сёрма, што квадраттнэде сынст сатышка. Александр пшкадсь тень коряс РФ-нь Президентэнтень. Московсто те сёрманть кучизь республикань ломантненень социальной лезксэнь максомань министерствас, кона кемекстызе, што те кудораськентень эряви седе покш эрямо тарка. Шкань ютазь теке жо министерствасонть мерсть, што лиссь ильведевкс, ды Князевтнень кудораськентень мезеяк а максови. Кода жо анокстазель те сёрмась, конань ало ашти те ведомствань министрань полавтыцянь кедьтешксэсь? Те шкас те кевкстемась кадови панжадо… Ацамковсто республикасонок юты лавшо шумбрачи марто ломантненень алтазь декада. Кадык сон канды ламо лезэ Александр Князевень кондят ломантненень.