«Кургоня» международнай фестивальсь. (МОКША)

Ёткшиста Рузаевскяй райононь Сузгарье велеса ётафтовсь «Кургоня» Международнай фестивальсь. Васенцеда сон кочксевсь Левжа велеса. И вов кизода меле «Кургонясь» сядонга келемсь и виясь — арась Международнайкс. Тя ульсь афкуксонь оцю ила, кона кочказень Финляндиянь, Эстониянь, Карелиянь, Удмуртиянь, Рузаевскяй, Сире Шайгавонь, Ельникань фольклорнай коллектифнень и ансамбльхнень. Фестивальсь фатясь сяшкава оцю аймак, што, кда варжакстомс фкя ширде, то сельмованфть аш виец фкя пингть няемс сонь. Тянь можна тиемс аньцек вярде ванозь. Шобдавакиге састь и састь Сузгарье вели автобусне, машинатне. Сембе усксть фестивалень участникт, инжихть. Тя бта оцю ярмарка, коса ульсь сембось: и эрь кодама ярхцамбяль и симомбяль, конатнень аноклазь кудазораватне, и декративно-прикладной паршись – тяфта жа лихтезь велень машты кядь ломаттне. Аноклаф площадкатнень эса етафтовсть эрь кодама пялькстоматне, конатнень эса няфнезь эсь вийснон эрь саф инжись. Ашесть юкста и емлатнень колгавок, иттне весялготкшнесть аттракциоттнень эса. Перьфпяльге кайгсь музыкась. Кштисть-морасть. Содамс, мезе пидихть-панихть тя или тона народсь – тя аф аньцек варжамс од таньфт, но и чёпафтомс лиянь культурати, сонь коензон-обуцянзонды. «Кургонясь» тя кельгома ярхцамбяльсна Рузаевскяй райононь эряйхнень. Соньфтемонза аф етафневи фкявок ила. Модамарьста и мичкста фестивальти тостонь пидихне-панихне анокласть оцю – фкя пяле мархта метрань келеса кургоня, мезьса дивандафтозь инжихнень. Ламоц инжихнень мархта фестивальса ульсть Государственнай Собраниянь оцюнясь Владимир Чибиркин, промышленностень министрсь Александр Седов, культурань и туризмань министрть васенце полафтыец Вячеслав Цилин, Рузаевскяй райононь оцюнясь Нина Иняткина и лиятне. Шужярень канкснень и нарнять лангса салсезь сельмованфть пидефсь-панефсь: перякат, пачат и конешна «Кургонясь» и позась. Азорватне сярьгядезь инжихнень, каванясть эсост. Тяфтама фестивальхнень пингста няфневи и азондови инжихненди эрь народть коензон-обуцянзон колга или марнек регионть квалма. Фестивальть сценанц лангста оцю инжихне поздравляндазь сембе пуромфнень праздник мархта. И вов маладсть инь таколфты минутатне, оцю «Кургонять» кота од церат кеподезь сценать лангс. Ламос савсь керсемс сонь аф оцю пакшкянь, конат явонтфолхть инжихненди. Тяда меле сембе илас сафне: самодеятельнай артисттне, ичкоздень конакне, велень эряйхне кундасть кяденьбецек, арасть оцю хороводс. Мокшень мелодиятнень коряс марса кеняртькшнесть и весялготкшнесть, няфнемок тянь мархта нароттнень марса пуромомаснон и ётксост ялгаксшить. Аделавсь илась оцю концертса и этнодискотекаса. Эсь мороснон морсезь поздна илядьс фольклорнай коллектифне.

Комментарии

Комментариев нет.