Касомс ды виевгадомс. Октябрьской райононть течинь чидензэ. (ЭРЗЯ)

Мордовиянь Прявтось тейсь цётамот Октябрьской райононь роботамонь зярыя иетнень перть ды макссь каршо валт эрицятнень кевкстемаст лангс. Октябрьской райононь эрицятне учость те вастовоманть, Прявтонтень кевкстематне ушодовсть ульцясо. Владимир Волков тешкстызе: эряви кирдемс эрьванть мелензэ. Сех пек те кандови райононь вадрялгавтомань коряс кевкстематненень, тесэ сеедьстэ вастневить вейке-вейкень ачарькодемат. Седе тов икелепелень тевтнеде. Моли эйдень 2 кужонь ды покштнэнь туртов поликлиникань стявтома Юбилейной микрорайонсонть. Неень шкане тосо эриця эйкакштнэнень эрявить 750 таркат. Прявтось яволявтсь, школась уш сы иестэ вастсынзе васенце тонавтницянзо. Истя витеви эйкакштнэнь лия тонавтнема таркас усксеманть марто кевкстемась. Региононь прявтось пшти мель мерсь явомс капремонтонь ды аварийной эрямо таркасто ломантнень туемань коряс кевкстематненень. 27 аварийной кудосто эрицятненень уш максозь од эрямо таркат. Те тевенть парсте топавтомга кармить стявтозь еще 13 тежат кавонзазь метрат. Ламо квартирас кудотнесэ капремонтонь ютавтомс явозь 370 миллионт целковойть. Ташто эрямо таркань калавтомас ды одонь явомас седеяк ламо. Кортызь и од райононь паролгавтоманть. Неень шкане весемезэ витнезь-мазылгавтозь 76 кудоюткот. Теевить парковкат. Владимир Волков алтась, што Химмашсо кармить озавтозь 3 паркт. Покш мель явови посёлкатненень. 60 миллионт ютасть ансяк коммуникациятнень ветямос. Велетнень витнемадо-паролгавтомадо кевкстемат истяжо ульнесть. Эсест стакачист марто пшкадсть Николаевкань эрицятне. Ламо иень перть 119 участкат учить газификация. Региононь Прявтось кунсолызе эрьва кевкстеманть. Весе сынь кармить топавтозь маласо шкастонть.

Комментарии

Комментариев нет.

This blog is kept spam free by WP-SpamFree.