Изнясь тиринь келень ды рузонь келень тонавтыцятнень туртов Весероссиянь мастер-классонть (ЭРЗЯ)

Эрзянь авась, Орданьбуень Низовка велень общеобразовательной школань эрзянь келень ды литературань тонавтыцясь Зоя Викторовна Клементьева сайсь омбоце тарка покш пелькстамосонть – тиринь келень ды рузонь келень тонавтыцятнень туртов Весероссиянь мастер-классонть. Зоя Викторовна изнясь «Учитель – мастер» номинациясонть. Тешкстасынек, тедеде Клементьева изнясь республикань «Эрзянь ды мокшонь келень сехте вадря тонавтыця» пелькстамосонть.
Те иень пелькстамось ульнесь юбилейноекс – кеменцекс. Тонавтыцянь мастер-классонтень Россиянь 56 регионсто кучозельть 318 важодемат. Тонавтыцясь парсте ютынзе кавто туртнэнь ды тердезель очной турс Московов, конась ютась ожоковонь 24-25-це читнестэ.
Покш лезкс тензэ макссь тейтерезэ Олеся, конась якась мартонзо. Аванзо марто пурнасть «Мой регион. Моя школа. Моя профессиональная деятельность» мазый, мельстуиця выставка. Те выставкась ульнесь пелькстамонь этапокс. Тонавтыцясь усксь Московов эрзянь раськень ярсамопельть, сувенирт, фотографият, книгат, викшневкст-кодавкст, някат ды тиринь раськень налкшкеть. Экспозициянть Олеся невтнесь мазый эрзянь оршамопельсэ.

Сехте талновтыця ёнксокс ульнесь мастер-классось. Зоя Викторовна 5-це классонь тонавтницятнень туртов невтсь «Таштомозь валтнэ» эрзянь келень уроконь пелькст. Уроконть ветясь эрзянь раськень оршамопельсэ. Тешкстама, малав весе тиринь келень тонавтницятне те пелькстамонтень сакшность эсест раськень оршамопельсэ. Зоя Викторовна ёвтни, весе участниктне ульнесть пек виевть, конкуренциясь покшоль ды эсензэ омбоце тарканть сон лови покш изнямокс ды уцяскакс.

Комментарии

Комментариев нет.

This blog is kept spam free by WP-SpamFree.

Главное сегодня