И.К.Инжеватов-учёный топонимист. (ЭРЗЯ)

Иван Корнилович Инжеватов чачсь Самарань областень Бугурусланонь райононь Кирюшкина велесэ. 1920 вачо иетнестэ кулость тетязо-авазо ды ниле ялаксонзо. Кассь эйдень кудосо. Семиясост лисезь зыянось, гражданской войнась полавтызь учёноенть обуцянзо, сы шканть лангс вановтонзо. Прядсь Самарань сисем иень школа, косо сонсь нолдась стенгазетат. Сеедьстэ яксесь вастовомас эрзя-мокшонь культурань деятельтнень марто. 1927 иестэ «Пионерэнь вайгель» газетасонть лиссь «Каникулав» васенце стихотворениязо. Мольсь тонавтнеме Вишка Толканонь педтехникумов, конань прядомадо мейле Инжеватовонь кучизь тиринь велев школань прявтокс важодеме. Зярыя иеть ульнесь Бугурусланонь народной образованиянь отделэнь прявтокс. 1940 иестэ прядызе А.И.Полежаев лемсэ Мордовиянь пединститутонть. Учёноенть чачома чистэнзэ саезь покш датантень Полежаев лемсэ музейсэ пурназель выставка. Ине Отечественной войнанть ушодовомсто Иван Корнилович Инжеватов тусь фронтов. Ансяк лавшо шумбрачинть кувалма куроксто демобилизовазель. Важодсь Оренбургонь областень МТС-нь политотделэнь прявтокс, райгазетань редакторокс. 1943 иестэ тонавтнесь партиянь Высшей школасо газетань отделениясо. Иень ютазь тердезель Молдавиянь КПСС-нь Компартиянь ЦК-нь аппаратс. Одс вельмевтсь издательстватнень, газетатнень, типографиятнень, кеместэ сюлмазель сёрмадыцянь республикань организациянть марто. Тесэ Инжеватов сёрмадызе литературоведениянь васенце роботанзо.
Эряви меремс, Инжеватовонь лезксэнзэ вельде нолдазель «История мордовской советской литературы» 3 томсо книгась.
Инжеватов – литературовед, критик, этнограф-топонимист, филологиянь наукань кандидат, СССР-нь сёрмадыцянь вейсэндявксос совиця, МАССР-нь школань заслуженной тонавтыця, Народной просвещениянь отличник. Казезь «Знак Почёта» орденсэ, зярыя медальсэ ды Почётонь грамотасо.
Эрямонь меельце иетнень Иван Корнилович алтынзе С.М.Люлякинанень. Сон ламосо лездась тензэ. Куломадонзо мейле Иван Корниловичень покшоль мелезэ панжомс сказительницанть ледстнемга музей. Ансяк те мелесь кадовсь апак топавто. А.И.Полежаев лемсэ музейсэ «Эрзя-мокшонь сказительтне» пелькссэнть Ф.И.Беззубовань, Е.П.Кривошеевань вакссо аштить Серафима Марковнань материалонзо.
Кулось И.К.Инжеватов 1996 иень ацамковонь 12 чистэ, калмазь Саранскойсэ.

Комментарии

Комментариев нет.