Этножурналистикань башкачитне ды стакачитне! (ЭРЗЯ)
Неть кевкстематнень домкасто ванкшнызь Н.П.Огарёв лемсэ МГУ-нь филологиянь факультетэнь тонавтыцятне, студентнэ ды Мордовиянь содавикс журналисттнэ. Семинарось ютась межэтнической журналистикань школанть лувсо. Те проектэсь топавтови эрямос 2010-це иестэ саезь. Арсицязо — межэтнической журналистикань Гильдиясь, кона пурназель 14 иеде теде икеле. Те вейсэндявксонть эрявиксчизэ покш. Теезельгак редявикс тувталонь коряс. Массовой информациянь средстватнесэ ильведевкстнэнь витемга ды анолдамга важодемась, чарькодеви, максы паро цётавкст. Ялатеке, неень шканеяк эрсить тевть, зярдо вейке валсо покордавить раськеть, мезесь вети ачарькодемас ды сеедьстэ кажов тевс. Секскак, эрьва журналистэнтень статьянь, сюжетэнь, радиопередачань анокстамсто мереви свал, педе пес тонавтнемс теманть, парсте арсезь ды эсь тевень содазь топавтомс важодеманть. Этножурналистикасо таштазь содамочитнеде, топавтоматнеде пачтясть семинаронь инжетне — национальной печатень ды электронной СМИтнестэ — «Сияжар» ды «Вайгель» редакциянь представительтне. Ёвтама, радиосто коллеганок тедеде тешкстыть васенце покш юбилеест, конантень эсь вийсэ анокстасть ёвкс марто 2 дискт. Истят вастовоматнень покш лезэвчидест ды эрявиксчидест тешкстыть студентнэ, сеть кить неень шкане тонавтнить ды сеть, кить сюлмизь эрямокист журналистиканть марто. Вастовомасонть а весть тешкстазель национальной кадратнень асатомадо кевкстемась. Мелесь, поладомс истят вастовоматнень кирдезель ве мельсэ. Истямо лувсо ушодыця специалисттнэ седеяк парсте чарькодьсызь журналистэнь тевень прявт смустенть! Содамга, тедеде межэтнической журналистикань школатне ютыть масторонок 23 регионсо, прядовить Весеросссиянь конференциясо, кона коень коряс юты Московсо.
<iframe width=»560″ height=»315″ src=»https://www.youtube.com/embed/1bnvummNx8A?rel=0&showinfo=0″ frameborder=»0″ allowfullscreen></iframe>