Эстониясо ледcтясызь Йовлань Олонь лемензэ. (ЭРЗЯ)

Ацамковонь 13-це чистэ Таллинн ошонь «Финноугрия» вейсэндявксонть нупальсэ карми ютавтовомо Йовлань Олонень алтазь лецтнемань чокшне. Ютавтыцясь – «Сятко» Эстониясо эрзянь ды мокшонь курось. «Олонь Эстониясо ламот содасызь. Минек «Сятко» вейсэндявксонтень сон тейсь ламо паро тевть, – корты «Сятконь» прявтось Абросимова Наталья. – Эстэнь раськенть покш ялгазо Йовлань Оло – те, васняяк, ломань пшти вановкс марто, кона пингеде пингес кадовсь минек седейтнес». Чокшнентень тердевить весе, кить содылизь ды вечкилизь Олонь. Те чокшнесэнть Олонь кармить лецтямо эстэнь, сетунь ялганзо ды Эстониясо эриця эрзятне. «Лецтнемань чокшненть тувталозо – невтемс, кодамо путовкс тейсь Оло Эстононь масторсо, зярдо «Торама» сашкнось Эстонияв 1998-2002 иетнестэ, – полады Абросимова. – Истя жо карматано ванномо ташто видеот, фотот, конатнень кандсызь Олонь эстэнь ды сетунь ялганзо. Тейтяно «Йовлань Оло ды сонзэ сюлмавксонзо Эстониянть марто» невтевкс-презентация».