Елена Анюшина – Олимпиадасо! (ЭРЗЯ)

Умарьковонь 15-це чистэ Рио-де-Жанейро ошсо ютыця Олимпиадасо ушодовсть байдаркасо ды каноэсэ миледемань коряс пелькстамотне. Россиянь сборноень составсо – Мордовиясто спортсменкась Елена Анюшина. Кира Степанова марто сынь лиссть Олимпиадань финалс ветесядт метрас миледемасо. Умарьковонь 16-це чистэ сынь кавонест бороцить сырнень медалень кис. 17-це чистэ Орданьбуестэ тейтересь ськамонзо невтьсы миледемасо ёрокчинзэ. Спортсменканть уцясканзо мельга вансть ламот. Ютазь ковсто байдаркасо ды каноэсэ миледемань раськеютконь федерациясь каизе Еленань ды Россиянь ещё 4 спортсментнэнь Олимпиадань налксематнестэ. Тувталось — весе спортсментнэ ледстязельть Весемасторонь антидопинговой агентствань независимой комиссиянь докладсо. Ансяк вешемадо мейле каноэнь раськеютконь федерациясь нолдызе Елена Анюшинань Олимпиадань налксематненень. Тейтересь невтизе, сон — ванькс спортсмен! Тиринь ёнкссонзо тень коряс эзть кавтолдо. Тесэ, чачома ёнкссонзо, Европань чемпионатонь кавксть призёронть кис мелявтыть ушодыця спортсментнэ. Олеся Никишаева тренерэсь а кавтолды Еленань вийтнесэ! 4 иеде теде икеле Европань первенствасо Елена Анюшина ды Олеся Никишаева уйсть вейсэ ды саизь изнямо тарканть! Спортонтень мельявомась Еленань – вишка пингстэ саезь. Ютко шканзо стяко эзь ютавтне. Свал мукшнось мельстуиця тевть. Спортсменканть тетязо ды авазо аштить каштанчисэ тейтерест изнявкстнэнь кис. Ледстнить, кода 8 иеде теде икеле масторонок тренерэсь Яков Костюченко тердизе эйкакшост Москов ёнксов. 14 иесэ тейтерензэ Валентина Анюшина пельсь нолдамс! Шкань ютазь чарькодсь, стяко! Жабино велесэ Ленань кис мелявтыть весе раськензэ. Пелькстамонь шкасто тиринь кудосо пурнавить ламот. Кортыть, истямо шкане эряви улемс вейсэ! Икеле покш цидярдомат! Ансяк кемятно, Елена лиси изницякс, ды тагояк невтьсы, Россиянь спортсментнэ – сех вадрят!

Комментарии

Комментариев нет.

This blog is kept spam free by WP-SpamFree.

Главное сегодня