«Чилисема» журналось аноксты 85 иень тешкстамонтень! (ЭРЗЯ)
Улемс свал важодемасо, нолдамс весементь седеень пачк! Истямо лувонь кирдезь, малав 30 иень перть важоди «Чилисемань» прявт редакторось Николай Ишуткин. Видьксты, важодемань ушодкссо ульнесть ламо стакачить, ансяк паро тевень ветямонтень покш бажамось, тиринь келень ванстомантень мельявомась лездасть весементь ютамс апак кавтолдо. Тиринь ёнксонь эрямопингеде, содавикс ломанде, финнэнь-угрань раськеде заметкат, вишка ловныцятнень туртов эрзянь ды рузонь кельсэ ёвтнемат ды валморот, эйкакшонь сермадовкст! Весемесь те муеви журналсонть. Меельце иетнень перть журналонь тиражось киртявсь, мезесь сюлмазь содавикс тувталтнэнь марто. Ялатеке, редакциянь важодицятнень вишка коллективесь бажи теемс эрьва нолдавксонть мельстуицякс ды ламо содамочинь максыцякс. Сынь зярдояк а аштить вейке таркасо, бажить топавтомс эрямос од арсемат-тевть. А стяко ламо иень перть журналось ловови паро лездамопелекс тиринь келень тонавтомасо. Валморосо Татьяна Мокшанова пачти тиринь журналдонть, ков сась важодеме 10 иеде теде икеле. Сюкпрянь валт ёвты васенце лездыцянзо туртов. Самара ёнкссто ушодыця сермадеесь ВУЗнь прядомадо мейле паро мельсэ кунды вечкевикс ды малавикс тензэ тевентень. Ней сон — отделэнь редактор. Яви башка мель сайтэнть марто важодемантень. Редакциясо важодицятне кирдить кеме сюлмавомат и лия региононь ловныцятнень марто. Пачтявиця од арсематнень журналонть паролгавтомга а кадыть мельтеме. Диаспорасо эриця эрзятне тешкстыть, сынст туртов «Чилисемань» эрьва од выпускось те — тиринь республикань марто вастовома! Ёвтама, вастовоматне ютыть сеедьстэ редакциясонтькак. Чистэнть, зярдо минек съемочной группась ютавтсь съемкат, прявт редакторонтень сакшнось инже Эстониясто. Покш датантень- журналонтень 85иетненень- редакциясь аноксты паро мельсэ. Талновтыця стакачикс важодемасонть каднови сёрмадстомань ютавтомась, конанть витемга путовкс тееви эрьвантень эйстэнек. Улезэ ансяк мель! Тешкстасынек, журналонть юбилеень экзэмплярось нолдави сы иень васенце ковсто.