Атяшевань «Эрзянь викшнемат» курось. (ЭРЗЯ)

Меельце шкастонть республикань тонавтнемань учреждениятнесэ виевгавтови дополнительной образованиясь. Те лувось канды кавто смусть: тонавтницятнень интеллектуальной кастомадост башка, а эряви кадномс вановтомо юткошкастак. Кавто иень перть Атяшевань Раськень культурань ды тевветямонь центрасонть роботы «Эрзянь викшнемат» тонавтомань курось.
Раськенек аватне свалшкане явсть башка мель викшнемань тевентень. Кезэрень шкатнестэ саезь викшнезь нардамось ды столь лангонь вельтямось лововсть инжень вастомань васенце атрибутокс. Эрзяватне ды мокшаватне ульнесть пек паро викшницят. Тейтерь эйкакштнэ кармильть тонавтнеме вишка порасто саезь: сынь анокстыльть эстест ули-паро, одирьвань казнеть. Нама, икеле викшневксэсь кандсь лия смусть, ней жо сон седе пек кирди декоративной ёнкс.
«Эрзянь викшнемат» тонавтомань курось кармась важодеме аволь пек умок. Ветицязо, Анастасия Сидорова, видьксты: викшнемань тевенть кочкизе а стяко, эйкакш пингстэ сеедьстэ ванкшнось, кода викшнесь сырькаезэ. Се шкастонть саезь ульнесь покш бажамозо поладомс те мельстуиця тевенть. Ней уж сонсь максы весе содамочинзэ эйдетнень туртов.
Мерема, неть занятиятнесэ эйкакштнэ аволь ансяк тонавтнить викшнеме, истя жо содавтовить минек койтнень-кирдатнень марто. Куронь ветицясь Анастасия Сидорова ёвтни тенст, кода викшнесть минек покштянок-бабанок, кодамо смусть сынь путсть те или тона викшневксэнтень.