АПК туртов од специалистнэнь анокстамодо ды сыненст лезксэнь максомадо программадонть. (ЭРЗЯ)

Республикань агропромышленной комплекссэнть важодить 30 тёжадо ламо ломанть, сынст эйстэ 17 тёжатне роботыть велень хозяйствасо. Теке марто тесэ улить ламо стакачить од важодицятнень коряс. Куватьс шкань перть велень хозяйствасо эзть сато агрономт, ветеринарной врачт, зоотехникть. Тень кардамонь кисэ 2015-це иестэ Мордовия Республикань прявтось сёрмадсь Указ, косо кортамось мольсь агропромышленной комплексэнть туртов од кадратнень анокстамодо ды сыненст лезксэнь максомадо. Течинь чис Мордовиянь 156 од ломанть кармасть те программань участникекс. Сынст эйстэ вейкесь — Юлия Конышева. Университетэнь прядомадо мейле сась важодеме агрономокс «Норов» аргофирмав. Те программанть коряс од специалистнэнь анокстамось ушодови тонавтнема шкасто. Нилеце курссто саезь велень хозяйствань прявтнэ вешнить эсест туртов од специалист, конат тонавтнемань прядомадо мейле кармить важодеме сынст хозяйствасо. Эряви меремс, од ломантненень пандовить аграрной стипендият. Сетненень кие тонавтни высшей учебной заведениясо стипендиядо башка пандовить 4 тёжат целковойть, средней специальной образования марто — 3 тёжат. Юлия Конышевань важодемань чись сюронь урядамонь шкасто ушодови рана валске, а прядови малав пелевестэ. Од тейтерень содась, кодамо сонзэ профессиясь ды а янкси, што важоди тесэ. Улиця зарплатадо башка сонензэ колмо иень перть эрьва ков пандовить 8 тёжат целковойть. Теде башка иес весть максовить 100 тёжат. Лездась фирмань прявтось эрямо тарка мартояк.