Антоновати — 90 киза! (МОКША)

Мордовиясь казсь странаньконди лама смузю морайда. Синь ётксост башка васта занци Мария Антонова, конань вайгялец кельговсь кулхцондыхненди шачема ширеньконь сембе уженясонза. Артисткась шачсь Рузаевскяй районца Левжа велеса музыкальнай семьяса. Пяк лац морасть сонь тядяц и аляц, улема, морамань асушись теенза ётась эздост. Кодгемоньда лама киза мокшавась казендезе эсь маштомашинц ваныхненди. «Умарина» содаф мороц арась республиканьконди символкс. Мария Антоновась ульсь концерт мархта аф аньцек шачема ширеньконь сембе аймакса, но и омба масторса. Фалу морась мокшень, эрзянь, рузонь морхнень эса аньцек эсь вайгяльса, фонограммафтома. Аф ваномок 90 кизотнень лангс, сон пяшксе вийда. Эрямс теенза лезды народнай искусствати кельгомась и колганза ломаттнень мяляфтомасна. Эряви азомс, што тёжянь вейхкса сятт вейхксогемонь котоце кизоста сявомок Саранск республикаса ётафтови Мария Антоновань лемса народнай моронь фестиваль-конкурс, конань эса кизоста кизос няфнесазь эсь маштомашиснон коль сяда лама участник. А тя корхтай сянь колга, што народнай морось мзярдовок аф юмай.

Комментарии

Комментариев нет.

This blog is kept spam free by WP-SpamFree.