Сияжар — редакциядо вал
Эрьва раськенть ули эсензэ устно-поэтической творчествазо – эпос, косо кортамось моли покштятнень-бабатнень икеле пингень эрямодост. Истя карелтнэнь ды финтнэнь «Калевала» эпосось, скандинавской раськенть «Нибелунгто моро», эстонецтнэнь – «Калевипоэг», эрзямокшонь раськенть В.К. Радаевень эпосось «Сияжар». Те церань лем, кона идесь тиринь мода масторонть ятонть эйстэ. А стяко вана зярыя иень перть лемдязь «Мордовия» ГТРК-нь национальной отделэсь.
Ютазь пингень 1930-це иетне эрзямокшонь раськень историяс совасть аволь ансяк кода государственной самостоятельностень теевемань шкакс, но башка тарка явовсь республиканской радиовещаниянтень. 1930-це иень суньдерговонь 28-це чистэ эфирсэ васенцеде гайгсть мордовской радионь позывнойтне, ушодсть роботамо рузонь ды эрзянь кельсэ передачатне. «Корты Саранскоесь! Говорит Саранск!..». Неть валтнэ Мордовиянь радионь кунсолыцятнень кармасть улеме тонадозь. Радиоэфирс литературно-драматической программат анокстасть сермадыцятне С.С. Ларионов, С.Ф. Пронин. Покш питне республикань эйкакшонь радиовещаниянь кепетемасо налксесь заслуженной сермадыцясь, Мордовской АССР-нь Государственной премиянь лауреатось Я. Пинясов. Неень шкасто радионь фондсо (фонотекасо) ванстовить эрзянь кельсэ записть сынст евтнемаст марто.
1957-це иестэ ушодокшнось лиснеме колмо (рузонь, эрзянь, мокшонь) кельсэ эйкакшонь радиогазета. Васня анокставсь рузонь кельстэ ютавтозь, седе тов эфирс мольсть оригинальной материалт. Иеде-иес тематне яла келейгатсть, телерадиокомитетэнь журналистнэ эсест вийсэ анокстасть тиринь кельсэ передачат «Литературась ды эрямось», «Эрзянь велесь течи». Седе тов неть программатне ютыть «Сияжар» — эрзя редакциянь свалшкань рубрикас.
1989 – 1990 це иетнестэ общественно-политической редакциясь ушоды анокстамо рузонь кельсэ передача «Учимся говорить на эрзянском и мокшанском языках», мезень коряс Мордовиянь эряцянзо пельде ульнесть евтазь пек ламо лембе валт.
1992-це иень даволговсто Мордовской ССР-нь телевидениянь ды радионь Государственной комитетэнь базасонть ульнесь панжадо «Мордовия» Государственной телерадиовещательной компания. Ульнесть ютавтозь кадрань полавтомат, панжовсть зярыя од редакцият: информационной, общественно-политической, художественной ды национальной «Сияжар». Бути теде икеле тиринь кельсэ кулятне анокставсть шкань-шкань ютазь, то ней сынь кармасть улеме эфирсэ свал. Пачтятано 1996-це иестэ телевидениянь студиясонть эрзянь кельс ульнесь дублирован полнометражный американской художественной фильма «Иисус». Истямо робота Мордовиясо анокстазель васенцеде. Сонзэ топавтыцятне американской студиясь «Inpireyhen filmz» ды Казанской киновидеоцентрась. Дубляж лангса роботасть мордовской национальной театрань налксицятне, телевидениянь сотрудниктне. Теде икеле те фильмась ютавтозель чувашонь, татаронь, башкирэнь кельтнес. Кода икеле истя нейгак эрзянь кельсэ важодиця журналистнэнь икеле ашти тевекс кода седе домкасто ды келейстэ ванномс национальной культурань вельмевтемань кевкстематнень, явомс мель койтнень-кирдатнень невтемантень, келень ды литературань ванстомантень.